lunes, 19 de abril de 2010

El Gaviero y el mar: fragmentos literarios para navegantes

Foto: Ana Santos Payán

Só há dragóes

Como’l marineru perdíu, impotente,

al aldu na mar estraño del desamor,

asina m’alcuentro d’esta manera

a la lluz de les condenades

faroles de los parques,

na barra de los chigres

de folixa con quienquiera

o escribiendo versos

-versos que nun han saname-

por quien nun atopo amparu,

nin sosiegu.

A la mar bravo con rellampos

y dioses crueles que saben xurgar

nel llibru cerráu de la memoria,

sucédese la calma, expectante,

l’horizonte espeyáu y nun momentu

(sona nostálxico música pela radio)

pienso qu’ellacullá,

más p’allá de la llinia de sombra

onde naide nun m’espera,

ta la tierra prometío,

la mirada duce que m’abriga

y ye la muerte.

Intento remembrar rutes, meridianos,

coordinaes, cenices y la certeza

de que vivir yá nun ye necesario.

Namás quería navegar al debalu,

escaeceme de la mano amarga

de los llibros o del valium

d’aquello qu’avisaben gafo

mapes abirugaos pol tiempu:

d’equí pa en delantre

namás dragones.


Xuan Bello


Fuente: Poesía Asturiana